Form und erinnerung erbhuldigung aydts, darauff die underthannen der graff- und herschafften Vadutz und Schellenberg schören sollen. [1]
14. April 1613
Ihr sollen und wöllen samendt- unnd sonderlich geloben unnd schwören für euch unnd ewere nachkhomben, der burger allẞ ein burger, der eigen mannn allẞ ein aigner unnd der hindersäẞ allẞ ein hindersäẞ, einen leiblichen aydt zue Gott unnd den heiligen dem hochwolgebornen herrn herrn Casparen graven zue der Hochenembs unnd Gallerate röm. kay. mayt. unnd erzherzoglichen durchlauchten zue Österreych etc. rath, vogt der herrschafften Sonnenberg und Newenburg, vnnseren gnedigen herren in [2] ihro gnaden erben und nach dero absterben dero geliebten herren söhnen und erben unnd sonst niemandts annderen alẞ ewren rechten natturlichen erbherren gethrew, höldt, gehorsamb, unnd gewerttig zue sein, ihnen frommen, nutz, ehr und wolfarth zue fürdern, schaden und nachtheil zue wahren und zue wennden nach ewrem böẞten vermögen, auch kheinen anndern herren, schutz und schirm, wider sie anzuenemmen, deren gebotten unnd verbotten zue allen zeytten gehorsamb und gewerttig zue sein unnd sonst gemeinlich alles andres zue hallten, zue thun unnd zue lassen, daẞ ein gethrewer burger unnd unnderthan seinem nattürlichen erbherren unnd obrigkheit von rechts unnd billicheit wegen zue thun schuldig unnd pflichtig ist. Alleẞ gethrewlich, erbar unnd ungeverlich.
Darauff der aydt mit mund und handt würklich allso soll erstattet werden.
Wie mir jetzundt vorgelesen unnd ich dasselbig wol verstannden habe, deme will ich allso nachkhomben unnd geleben, gethrewlich unnd ungeverlichen. So wahr mir Gott hülff unnd alle heilligen.
Praestiert unnd exequirt den 15. Aprilis anno 1613. [3]
______________
[1] LI LA RA 1/3/5. Zeitgenössicher Rückvermerk: „Formb und Erinnerung Erbhuldiung aydts der Vadutz- und Schellenbergischen Underthanen eiquiret den 15 Aprilis Jah. 1613“. Späterer Rückvermerk von Franz Xaver Menzinger: „Huldigungseid den die Unterthanen der Herrschafften Vadutz und Schellenberg abgeschwohren haben ao 1613“.
[2] Müsste wohl"und" heissen.
[3] Zusatz von anderer Hand.