Johann Franz Paur [Bauer] berichtet dem Fürsten Johann Adam Andreas von Liechtenstein über die Schwierigkeiten, mit den geringen Einkünften der Herrschaft Schellenberg verschiedene Güter wie den Renn-, den Schmelzhof und Weinfässer zu kaufen.

Durchleuchtigister fürst.

Gnädigister fürst und herr, herr.[1] 

Neben wichtigen empfang des schellenbergischen canzley-signets[2] habe ewer hochfürstlich durchlauchtigkheit gnädigisten consens[3] zue denn fass-, auch Schmelz-[4] und Rennischen Hoffs[5] khauff aus dennen schellenbergischen intraden[6] zue bestreiten, gehorsambst vernommen mit underthenigistem respect hingegen unverhaltende, das die mehrertheils in wein und frücht bestehende einkhünfften ohne großen schaden hierzue nit wohl verwendet werden, und die ybrigen erst nach Martini[7], Liechtmeß[8] und Faßnacht eingehende gelt-geföll[9] darumb wenig außrichten können, weilen solche nach anzaig des urbarii gering und unerklecklich seindt, zumahlen, wie öffters unndertheinigist berichtet, eventualiter[10] auf pares gelt tractiert[11], und nach angewendtem schuldigisten eiffer die mehriste bezahlung der fassen und Rennischen Hoffs nach selbst aigens gnädigist eröffneter intention[12] in Wien[13] zue schliessen procuriert[14] worden ist. Wie dann des hoffs halber den 9. decadentis[15] das ultimatum gehorsambst referiert[16] und under heutigem dato des verkheuffers brueder umb 175 fl.[17] an ewer hochfürstlich durchlaucht hoffzahlambt verwißen habe, es beruehet aber beedes auf ewer hochfürstlich durchlaucht gnedigister genemhaltung. /

Wann die wein und fürchten gleich also warmmer, und sonderbahr der wein vor 5, 6 oder mehr jahren ohne bessere menage[18] angegriffen und zue gelt gemacht werden sollten, so were die provision an fassen unnöthig, sodann meine würthschafft der vormahlig nit ungleich. Der Schmelzhoff wirdt umb 2500 fl. æstimiert[19], dargegen aber mangelt mir kheine gelegenheit den proprietarium[20] zue besserer maturierung[21] zue bringen.

Von zeit der immission[22] habe an paarem gelt 356 fl. 14 kr.[23] 2 hl.[24] außgegeben, an unbestänndigen gefällen[25] aber alleinig 120 fl. 2 x. 2 hl. einrentiert[26] worden seindt. Zue heutigen tag bin ich umb andere faß, raiff, denn zimmerleuthen in törgglen[27] und anderen noch 90 fl. 20 kr. abzuetragen schuldig, welche aus khünfftigen intraden sambt dem resst auff den Rennischen Hoff und die mit eisen gebundene faß bestreitten werde. Würden ewer hochfürstlich durchlaucht so gnädigst sein, und mir einen offnen wexel von 4, 8, 12, 15 bis 20.000 fl. successive[28], in Augspurg[29] zu erheben, anverthrawen, so hoffete in kurzem durch gnädigiste / resolvierte[30] anloßung frembder capitalien von 2 bis 3.000 fl. zue prosperieren[31].

Es gibt einen täglichen antrag schöner parthyen, waiß aber ohne baarschafft nichts zue effectuieren[32], wie dann erst vor zwayen tagen in 4 posten 1.094 fl. capital gegen 938 fl. hete anlößen könden, auß mangel der cräfften aber einem Pündtner[33] 164 fl. gewinn lassen müessen. Die capitalien verkhaufft niemand, als der genöthigte, oder der durch vorhin gnedigst bekhandte weiß [...] abgemattete. Es belieben also ewer hochfürstlich durchlaucht auf alles gnedigist zue reflectieren[34]. Die kayserliche subdelegations-commission[35] versichert mich sub dato[36] 7. Octobris samb der schellenbergischen khauffschilling bis auf wenige hundert gulden (die annoch zuerückh verbleiben) bezahlt und mann parat were, die particular-quittungen[37] gegen behöriger specification[38] zue behändigen. Ich aber bin persuadiert[39], das euer hochfürstlich durchlaucht an verwendung des khauffschillings wenig oder gahr nichts, sonder alleinig umb die freystellung der herrschafft zue thuen sein werde. / Ob aber solliches zue thuen die wenige hundert gulden erkleckhlich seyen, mueß ich nit allein sehr zweifflen, sonder der statt Veldtkhirch[40] zimblich lauthe discours[41], und das der stattammann Cläßin[42] kurz verwichens ohne gelt von Kempten[43] zurückh abgefertiget worden, mich ein annderes zue glauben machen wollen, dises aber will ich mit allem respect gemeldet, und ewr hochfürstlich durchlaucht mich underthenigst gehorsambst empfohlen haben.

Eur hochfürtlich durchlaucht.

Veldtkhirch, den 16. Octobris anno[44] 1699.

Underthänigst, threw, gehorsamster diener.

Johann Franz Paur[45], manu propria[46]. /

[Rubrum]

Præsentatum[47], den 4. Novembris 1699.

Schellenbergischer verwalter umb einen wexel et in diversis[48].

[Adresse]

Dem durchleüchtigisten fürsten und herren, herren Johann Adam Andreas, deß Heiligen Römischen Reichs[49] fürsten und regiereren des hauß Liechtenstain von Nickholspurg[50], in Schleßien[51] herzog zue Troppaw[52] und Jägerndorff[53], ritteren des Guldinen Flüsses[54], der römisch kayserlichen mayestät[55] würckhlichen gehaimen rath und cammeren, etc. Ihro durchleucht, meinem gnedigisten herren.

Wienn per Feldsperg[56].[a]