Johann Franz Paur [Bauer] berichtet dem Fürsten Johann Adam Andreas von Liechtenstein über den Kauf von gebrauchten Holzfässern, die er für die Einlagerung des Weins benötigen werden.

Durchleuchtigester fürst.

Gnädigester fürst und herr, herr, etc., etc.[1] 

Vorgesteren hat sich ein parthii von 15 biß 20, mit eysenen reuffen gebundtn, und noch nit vor 16 jahren sambt und sonders newgemachter faßen herfürgethan. Dise habe sogleich besichtiget und in dem hallt von ohngefahr 50 bis 54 fueder[2] befunden. Obwohlen zwar ewr hochfürstlich durchlaucht zue denen bereiths an mich gebrachten dermahlen so vill nit von nöthen haben, so seindt doch guete fass, wegen seltenheit deß aichenen holzes nit gemein, und ist auch auf die vaduzische ein geringe, oder gahr kein reflection[3] zue machen, bevor deren wenig brauchbar sein und zue hauffen geschlagen werden müessen. Ahn allten 30, 40 biß 50 jährigen in höltzenen raiffen ligendten fässeren wirdt hinc inde[4] daß fueder pro 2 fl.[5] 50 x.[6], 3 fl., 3 ½ fl., auch 4 fl. und 4 fl. 10 x. verkhaufft. Die newe aber seindt unter 5 biß 5 ½ und 6 fl. nit zue haben. Disem zuenegst costet alle 3, 4 und 5 jahr daß fueder in raiffen und band zue erhallten wenigst 2 ½ bis 3 fl. und stehet in effectu[7] ein neues fass und dessen underhallt in 20 jahren 18 fl. ohne, das des uncostens / […] kein end were. Auß disen rationibus[8] bin ich bewogen worden, auf ewr hochfürstlich durchlaucht gnädigste genemhalltung die fass, deren sonsten das fueder in eyßen zue binden ohne küefers verdinst auf 12 fl. kommet, anzuefaylen und auf iedes fueder 9 fl. 10 x. zue schlagen. Der proprietarii[9] aber wollte solliche in instanti[10] nit anderster, als pro 10 fl. 40 x. hinlaßen, nit zweyflendte, sollche pro 10 fl. noch beyzuebringen sein werden. Wan ich den underhallt deren mit holz gebundenen fässeren gegen den eisenen perpetuität vel quasi[11] und zuemahlen der besseren gewehrschafft considerire[12], so mueß ich zue sollichem kauff umb so mehrer threw gehorsamst einrathen, als sollicher nit alle tag anzuetreffen ist, die bezahlung zue Wien[13] accept[14], die provision biß hieher ersparet, mithin wan alle stückh beygekhaufft werden, solliche von denen bürgern niemand anfallen wirdet. Die erforderliche gnädigste resolution[15] ist ultra festum S. Mathaei[16] unverschieblich, von darumben eine solliche bis dahin geben zue können, mir diße underthänigst außbette. Jüngst gemelter Mesmerischer[17] mandatarius[18], herr Johann Jacob Hutsch[19], ohnangesehen er ein feldtkirchisches / rathsmitglid, ist gantz officios[20], und bearbeithet sich eufferig umb beyringung deß jüngst underthänigst memorierten[21] Schmelzhoffs[22]. Diser bittet gehorsamst ewr hochfürstlich durchlaucht mechten so gnädigst sein, und durch jemanden der ihrigen bey den niederösterreichischen referendario herrn von Buel[23] sein herren Hutschens angelegenheit wegen Mamingen[24] und seiner daßselbsten habendten blaichen höchstvermöglich recommendieren[25] lassen, deß gehorsamsten erbüethens, diße höchste gnad in andere weeg widerumb zue remeritieren[26]. Dißes, sein desidorium[27], secundiere[28] ich, gehorsamest in tiefester submission[29] verpleibendte.

Ewr hochfürstlich durchlaucht.

Feldtkürch, den 24. Augusti 1699.

Underthanigst, threw, gehorsamster diener.

Johann Franz Paur[30], manu propria[31]. /

[Rubrum]

Præsentatum[32], den 6. Septembris 1699.

Schellenbergischer verwalter in puncto[33] der zu verkauffen stehenden väßer in eysernen bandt.