Eid des Zollers

Zwischen 1505 und 1510 [1]

Dis ist der aid wie ain jegelicher zoller sweren sol dis nachgeschriben artickel trulichen zu halten, den zoll in zu ziehen

Jtem des ersten sol er sweren minem gna^edigen herren vnd ainem jeden vogt an sinr gnaden statt, trúwen [2] dienst zu^o halten, minem gna^edigen herren trúw vnd hold zu^o sin, siner gnaden nuz fûrderen vnd schaffen vnd siner gnaden schaden warnen vnd wennden nach sinem besten vermugen. Desglychen ainem jeden vogt, nit minder noch weniger denn minem gna^edigen herren, trûw vnd hold zu^o sin, sinen nucz fûrdern vnd schaffen vnd sinen schaden warnen vnd wenden vnd im gehorsam vnd gewertig zu^o sind jn allen zimblichen sachen vnd befelchen.

Zum andren des zols ain flyssig vf sa^ehen zehaben, vnd des trûlich warrten, vnd siner gnaden oder ains vogtz gescha^efften, vnd och mit anders sich daran nit lassen verhinderrn, vnd was an dem gemelten zoll gefelt, jn sinen aignen nucz nit bruchen noch veraberhandlen, sunder alles, so gefelt, zu^o aines vogtz handen zu^o antwúrten

Er sol zu^o zimblichen zyten mit ainer howen vff die straäss gon, die güllen vslaussen, etwann stain daryn werffen vnd den weg besserrn ye zu^o zyten, so er des statt vnd wyl hat, da mit dester fu^ero schaden, vnd clag verhu^et werde

Er sol och ta^eglich, wa es mit fu^og sin mag, zumm morgen essen vnd zumm nacht mal vff dz schloss gon, vnd da obnen essen, vnd kain mal im wircz huüs essen, es begeb sich dann, das so^elichs nit sin mo^echt, fúr vnd schadens halb, so sol er dasselb zimblicher mass halten, vnd was er also der gstalt oder etwan jn ainer vnder vrten, die er mit köfflûten vnd anderrn zolshalb zimblicher mass tudt, das sol aber alles vfgeschriben vnd ainem vogt verrechnet werden, vnd sich kainer geselschaft beladen, dar vs schad erwachsen mo^echt

Das zoll brot sol von jtem zu^o jtem vfzaichnet, vnd wa hin es an gelegt wirt, ainem vogt verrechnet werden. Och sol ain zoller kainem baiten, er wisse denn, das es gewiss sey, alles trulich vnd vngefarlich.